Sut rydym yn delio â chwynion
Gall gwneud cwyn ymddangos yn anodd, ond rydym eisiau ei gwneud mor rhwydd â phosibl i chi fel y gallwn gael pethau'n iawn.
Pan fyddwch yn cwyno byddwn yn
- eich e-bostio neu'n eich ffonio er mwyn cydnabod eich cwyn o fewn 2 ddiwrnod gwaith os byddwch wedi rhoi eich manylion cyswllt i ni. Os na fydd eich manylion cyswllt gennym, byddwn yn cydnabod eich cwyn yn ysgrifenedig
- delio â chi mewn ffordd gwrtais a phroffesiynol
- cymryd eich cwyn o ddifrif a'i chadw'n gyfrinachol
- unioni unrhyw gamgymeriadau cyn gynted â phosibl; a
- rhoi gwybod i chi beth yw canlyniad ein hymchwiliadau, neu'r sefyllfa ddiweddaraf arnynt o fewn 15 diwrnod gwaith o dderbyn eich cwyn.
Os byddwn wedi gwneud camgymeriad byddwn yn
- ymddiheuro
- egluro beth aeth o chwith a pham
- gwneud unrhyw newid angenrheidiol i roi pethau'n iawn.
Byddwn wastad yn ceisio dysgu o'n camgymeriadau.
Sut gallaf gwyno am y gwasanaeth a gaf gan y CSA?
Os nad ydych yn fodlon â'r gwasanaeth a gawsoch gennym, gallwch gwyno. I wneud cwyn, dylech gysylltu â'r bobl sy'n delio â'ch achos, naill ai dros y ffôn neu yn ysgrifenedig. Mae eu manylion cyswllt ar unrhyw lythyr rydym wedi'i anfon atoch.
Neu gallwch e-bostio eich cwyn atom gan ddefnyddio'r ffurflen gwyno ar-lein sydd ar gael isod:
- Anfonwch gŵyn i Belfast
- Anfonwch gŵyn i Birkenhead
- Anfonwch gŵyn i Dudley
- Anfonwch gŵyn i Falkirk
- Anfonwch gŵyn i Hastings
- Anfonwch gŵyn i Plymouth
Beth fydd yn digwydd nesaf?
Bydd y bobl sy'n delio â'ch achos yn edrych ar y materion a godwyd gennych. Os na allant ddatrys eich cwyn, byddant hwy'n ei hanfon at ein Tîm Datrys cwynion yn y swyddfa honno.
Os ydych chi'n teimlo nad yw'r bobl sy'n delio â'ch achos wedi datrys y materion a godwyd yn eich cwyn yn foddhaol, dylech gysylltu â'n Tîm Datrys cwynion eich hun a rhoi gwybod iddynt.
Mae ein Tîm Datrys Cwynion yn ceisio datrys y materion na allai'r bobl sy'n delio â'ch achos eu datrys. Mae cyfeiriad y Tîm Datrys Cwynion ar y llythyr y byddwn wedi'i anfon atoch ynghylch faint o gynhaliaeth plant y dylid ei thalu.
Caiff y rhan fwyaf o gwynion eu datrys gan ein Tîm Datrys Cwynion o fewn 15 diwrnod gwaith. Bydd y tîm hwn yn cysylltu â chi ac yn siarad am y materion rydych wedi'u codi a chytuno ar sut i'w datrys. Os credwn na allwn ddatrys eich cwyn o fewn 15 diwrnod gwaith, byddwn yn cytuno ar gynllun gyda chi i'w datrys.
Beth fydd yn digwydd os nad wyf yn fodlon â sut y deliwyd â'm cwyn?
Os nad ydych yn fodlon â'r ymateb gan y Tîm Datrys Cwynion, gallwch ofyn i'n Tîm Adolygu Cwynion ystyried eich cwyn. Byddant yn edrych i weld a ddeliwyd â'r gŵyn yn briodol ac i weld a ellir gwneud unrhyw beth arall i helpu.
Gallwch gysylltu â'n Tîm Adolygu Cwynion drwy:
- ysgrifennu i'r cyfeiriad a roddwyd ar y llythyr y mae'r Tîm Datrys Cwynion wedi'i anfon atoch, neu
- anfon e-bost i'r ganolfan sy'n delio â'ch achos.
Ar ôl cael ymateb gan y Tîm Adolygu Cwynion, os ydych yn dal i deimlo nad ydym wedi delio â'ch cwyn yn briodol, gallwch ysgrifennu at yr Archwilydd Achosion Annibynnol (ICE).
A allaf gael help i gwyno?
Os hoffech gael rhywfaint o help i gwyno am y gwasanaeth a gawsoch gennym, gallech wneud y canlynol:
- Gofyn i sefydliad fel y Ganolfan Cyngor Ar Bopeth. Mae gennym gysylltiadau i nifer o sefydliadau eraill a allai fod yn ddefnyddiol i chi.
- Gofyn i gyfreithiwr. Efallai y gallwch gael cyngor am ddim o dan y Cynllun Cyngor a Chymorth Cyfreithiol (arferai gael ei alw'n gymorth cyfreithiol). Gall eich cyfreithiwr ddweud wrthych os oes gennych hawl i gael hwn.
- Siarad â'ch Aelod Seneddol (AS).
Gall eich AS hefyd ofyn i'r Ombwdsman Seneddol a Gwasanaeth Iechyd edrych ar eich cwyn.
Top y dudalen
Gwybodaeth berthnasol
- Darllenwch ein taflen "Sut gallaf gwyno am y gwasanaeth a gaf gan yr Asiantaeth Cynnal Plant?" [128Kb]
