Hafan › Eich achos › Adolygiadau cynhaliaeth ac apeliadau › Apelio › Pryd a sut i apelio

Pryd a sut i apelio

Os ydych am apelio, dylech naill ai lenwi'r ffurflen yng nghefn ein taflen Sut gallaf apelio yn erbyn penderfyniad cynhaliaeth plant? neu ysgrifennu llythyr atom sy'n dweud wrthym

  • eich rhif cyfeirnod cynhaliaeth plant (bydd hwn ar ben y llythyr sy'n dweud wrthych am y penderfyniad)
  • y penderfyniad rydych yn apelio yn ei erbyn
  • y dyddiad ar y llythyr sy'n dweud wrthych am y penderfyniad, ac
  • y rhesymau pam y credwch fod y penderfyniad yn anghywir.

Mae'n rhaid i chi lofnodi'r ffurflen apêl neu'r llythyr hefyd. Os ydych wedi gofyn i rywun eich cynrychioli, gallant hwy lofnodi'r ffurflen neu'r llythyr. Fodd bynnag, dim ond os ydych wedi dweud wrthym yn ysgrifenedig bod y person hwn yn gweithredu fel eich cynrychiolydd y gallwn dderbyn hyn.

Child Support Agency
Central Appeals Unit
R Block
Government Buildings
Lytham St Anne's
FY1 1GJ.

Dylech anfon eich apêl atom ni o fewn mis o ddyddiad y llythyr sy'n dweud wrthych am ein penderfyniad.

Beth fydd yn digwydd os bydd fy apêl yn hwyr?

Os byddwch yn apelio ar ôl y terfyn amser (mwy na mis ar ôl dyddiad y llythyr gwreiddiol a gawsoch gennym ynghylch y penderfyniad), efallai na dderbynnir eich apêl. Bydd ein Huned Apeliadau Ganolog yn anfon pob apêl hwyr yn awtomatig i'r Tribiwnlys Apeliadau Nawdd Cymdeithasol a Chynnal Plant (SSCSA) - y rhan o'r Gwasanaeth tribiwnlys sy'n gwrando apeliadau yn erbyn ein penderfyniadau.

Cyfrifoldeb y Tribiwnlys SSCSA yw penderfynu a fyddant yn derbyn apêl hwyr. Dim ond os byddant yn fodlon ar y canlynol y gallant wneud hyn

  • mae siawns resymol y bydd yn llwyddo
  • mae yna amgylchiadau arbennig
  • nid oes mwy na blwyddyn wedi mynd heibio ers i'r terfyn amser ar gyfer apelio ddod i ben.

Top y dudalen

Yr amgylchiadau arbennig yw:

  • rydych wedi bod yn ddifrifol wael
  • mae perthynas (eich partner neu rywun sy'n dibynnu arnoch, fel plentyn) wedi bod yn ddifrifol wael neu wedi marw
  • rydych yn byw y tu allan i'r Deyrnas Unedig
  • amharwyd ar y gwasanaethau post, neu
  • mae'r tribiwnlys SSCSA yn penderfynu bod rheswm eithriadol a pherthnasol arall a oedd yn golygu na allech apelio o fewn y terfyn amser.

Os ydych am iddynt ystyried derbyn eich apêl hwyr, mae angen i chi ddweud wrthym pam ei bod yn hwyr, gan ddefnyddio'r blwch perthnasol ar y ffurflen apêl neu drwy ddweud wrthym yn y llythyr apêl y byddwch yn ei anfon atom.

Bydd y Tribiwnlys SSCSA yn edrych ar y rhesymau a roddwyd gennych ac yn penderfynu a ddylai eich apêl fynd yn ei blaen ai peidio. Os na fyddant yn derbyn eich rhesymau, ni fydd eich apêl yn mynd yn ei blaen.

Beth dydd yn digwydd pan fydd y CSA yn derbyn fy apêl?

Pan fyddwn yn derbyn eich apêl, byddwn yn gwneud yn siŵr eich bod wedi rhoi'r holl wybodaeth sydd ei hangen arnom. Os byddwch wedi gwneud hyn, byddwn yn dechrau archwilio eich apêl gan ddefnyddio'r broses a eglurir yn yr adran hon.
Os nad yw eich apêl yn cynnwys yr holl wybodaeth sydd ei hangen arnom neu os nad ydych chi neu'r person y gofynnwyd iddo eich cynrychioli wedi'i llofnodi, ni allwn ei derbyn. Mae hyn am nad yw wedi'i chyflwyno'n gywir. Yna byddwn yn ei dychwelyd atoch i'w chwblhau, neu byddwn yn gofyn i chi roi mwy o wybodaeth i ni o fewn 14 diwrnod.

Os byddwch yn dychwelyd popeth sydd ei angen o fewn 14 diwrnod, byddwn yn trin eich apêl fel pe bai wedi'i gwneud ar amser. Os nad ydych yn credu y gallwch gadw at y terfyn amser hwn, rhowch wybod i ni ar unwaith. Efallai y gallwn roi mwy o amser i chi.

Os na fyddwch yn dychwelyd y wybodaeth y gofynnwn amdani o fewn yr amser a ganiateir, byddwn yn anfon yr hyn y byddwch wedi'i ddarparu i'r Tribiwnlys SSCSA. Efallai y byddant yn penderfynu peidio â'i derbyn am nad yw'r apêl wedi'i chyflwyno'n gywir.

Edrych ar y penderfyniad eto

Pan fyddwn yn derbyn apêl, byddwn yn edrych ar y penderfyniad gwreiddiol yn ofalus. Mewn rhai achosion, efallai y byddwn yn cysylltu â chi yn uniongyrchol i geisio datrys y mater - naill ai drwy egluro'r rhesymau dros ein penderfyniad, neu i gael mwy o wybodaeth. Yna os ydych yn fodlon â'r eglurhad hwn, neu os byddwn yn newid y penderfyniad i ystyried y wybodaeth a godwyd gennych, ni fydd yr apêl yn mynd yn ei blaen.

Top y dudalen

Paratoi cyflwyniad apêl

Os na fyddwn yn newid y penderfyniad, byddwn yn paratoi cyflwyniad apêl ar gyfer y Tribiwnlys SSCSA. Mae'r cyflwyniad apêl yn cynnwys yr holl wybodaeth sydd gennym ar y penderfyniad gwreiddiol a pham y gwnaethom y penderfyniad (fel y ffurflen gais wreiddiol, slipiau cyflog, cyfriflenni banc ac unrhyw lythyrau a anfonwyd neu a dderbyniwyd) yn ogystal â'r holl wybodaeth sydd gennym ar yr apêl. Bydd hyn yn cynnwys copïau o lythyrau rydych chi, neu'r bobl eraill sy'n ymwneud â'r apêl, wedi'u hysgrifennu, os byddant yn helpu i egluro'r penderfyniad neu'r rheswm dros apelio.

Yna byddwn yn anfon copïau o'r cyflwyniad apêl i'r Tribiwnlys SSCSA, atoch chi a'r holl bobl eraill sy'n gysylltiedig â'r apêl. Cyn anfon y cyflwyniad apêl, byddwn yn gofyn i'r holl bobl sy'n gysylltiedig â'r apêl os hoffent i unrhyw wybodaeth a fyddai'n datgelu lle maent yn byw gael ei dileu oddi ar bapurau'r apêl.

Os hoffech gadw eich cyfeiriad yn gyfrinachol, rhaid i chi ddweud wrth ein Huned Apeliadau Ganolog o fewn 14 diwrnod i'r dyddiad ar y ffurflen a anfonir atoch ynghylch hyn. Os na fyddwch yn ateb, byddwn yn cynnwys y wybodaeth yn y cyflwyniad apêl.

A oes unrhyw amgylchiadau pan na fydd y CSA yn parhau gyda'm hapêl?

Oes, mae dau amgylchiad pan na fyddwn yn parhau â'r apêl

  • os nad yw'r apêl wedi'i chyflwyno'n gywir, fel y gwnaethom egluro'n gynharach, neu
  • os bydd ein Huned Apeliadau Ganolog yn penderfynu nad oes unrhyw siawns resymol y bydd eich apêl yn llwyddiannus, gan ei bod yn erbyn rhywbeth a nodir yn y gyfraith. Er enghraifft, ni allai apêl ynghylch y ffordd rydym yn gweithio cynhaliaeth plant allan lwyddo, gan ein bod wedi defnyddio'r broses safonol a nodir yn y gyfraith.

Yn yr achosion hyn, bydd ein Huned Apeliadau Ganolog yn paratoi cyflwyniad apêl byr, y byddwn yn ei anfon at y Tribiwnlys SSCSA. Byddwn hefyd yn anfon copi atoch chi. Bydd tribiwnlys yn adolygu hyn a naill ai

  • yn cytuno â'n safbwynt nad oes gan yr apêl unrhyw siawns resymol o lwyddo
  • yn penderfynu bod rhywfaint o siawns y gallai'r apêl lwyddo.

Os felly, bydd yr Uned Apeliadau Ganolog yn ysgrifennu cyflwyniad llawn ar gyfer y tribiwnlys apeliadau. Byddwn yn anfon llythyr atoch i ddweud wrthych am benderfyniad y Tribiwnlys SSCSA. Os byddant yn penderfynu derbyn eich apêl, byddwch yn cael y cyflwyniad llawn yn ddiweddarach.

Os ydych wedi gwneud apêl nad oes ganddi unrhyw siawns resymol o lwyddo, bydd gennych hawl i apelio yn erbyn y penderfyniad gwreiddiol am resymau eraill - er enghraifft os nad yw darn perthnasol o wybodaeth yn cael ei ddefnyddio wrth weithio allan y gynhaliaeth plant sy'n ddyledus.

pryd a sut i apelio

Y gwrandawiad apêl

Canlyniadau apeliadau

Cysylltiadau Uned Apeliadau


Top y dudalen

Gwybodaeth berthnasol

Offer

Cyfrifydd cynhaliaeth y cynllun newydd